Posición do pronome átono (IV)

Hoxe imos falar dos indefinidos, xunto cos cales a colocación dos pronomes persoais átonos é algo máis complexa:

• Ninguén, nada e ningún, xa polo simple feito de seren negativos, atraen o pronome antes do verbo.

Exemplo disto atopámolo nunha páxina de La Voz de Galicia:

" (...) ninguén o vai facer por nós (...)"

• Algo, alguén, ambos, bastante, calquera, demasiado, entrambos, mesmo, pouco, propio e todo normalmente tamén esixen a anteposición do pronome.

Vémolo nun exemplo da páxina web Galicia-hoxe:

" (...) calquera o diría(...)"

• O resto dos indefinidos habitualmente non provocan a anticipación do pronome átono (é dicir, van pospostos) a non ser que a oración na que se inclúan se entoe dun modo enfático.

Podemos velo nuns exemplos extraídos da páxina web Caixa Galicia:

" (...) Moitas destas operacións realízanse (...)"

" (...) ambos os enfoques xustaporanse (...)"